ბათუმში Cipriani Batumi-ის მშენებლობას უღებენ სტარტს

ბათუმში წარადგინეს Cipriani Batumi, მაღალი კლასის საცხოვრებელი და სასტუმრო კომპლექსი. პრეზენტაციას პრემიერ-მინისტრი და ფეხბურთის ლეგენდა რონალდინიო დაესწრნენ.

ბათუმში წარადგინეს ახალი მასშტაბური პროექტი, Cipriani Batumi, მაღალი კლასის საცხოვრებელი და სასტუმრო კომპლექსი, რომლის მშენებლობაც იწყება.

პროექტის პრეზენტაციას საქართველოს პრემიერ-მინისტრი ირაკლი კობახიძე დაესწრო. მისი თქმით, ასეთი მასშტაბის ბრენდის შემოსვლა საქართველოში ახალ სტანდარტს ადგენს სასტუმრო ბიზნესისა და პრემიუმ უძრავი ქონების განვითარებაში და კიდევ ერთხელ ადასტურებს, რომ საქართველო უცხოელი ინვესტორებისთვის საიმედო და მიმზიდველი ქვეყანაა.

Cipriani 1931 წელს ვენეციაში დაარსდა და მსოფლიოს 19 ქალაქში მუშაობს. ბათუმი ამ სიას ნიუ-იორკის, ლონდონის, მონტე-კარლოს, დუბაის, მაიამისა და სხვა ქალაქების გვერდით შეემატება.

პრეზენტაციის საპატიო სტუმარი იყო ფეხბურთის ლეგენდა რონალდინიო, რომელმაც ახალ კომპლექსში ბინა შეიძინა და პროექტის პირველი მესაკუთრე გახდა. Orbi Group-ის გენერალურმა დირექტორმა მას სიმბოლური გასაღები გადასცა.

Cipriani-ის ბათუმში მოსვლის შესახებ ინფორმაცია ადრეც გავრცელდა: 2025 წელს Bloomberg წერდა, რომ კომპანია ბათუმში ახალი კურორტის განვითარებას გეგმავდა.

მშენებლობის დასრულების ვადებისა და ბინების ფასების შესახებ დეტალები ჯერ ღიად არ გამოქვეყნებულა. ახალ ინფორმაციას apartments.ge-ზე გაგაცნობთ.