სიახლეები

რა ღირს ძველი აშენებული ბინები თბილისში

რა ღირს ძველი აშენებული ბინები თბილისში

დედაქალაქში ყოველწლიურად სულ უფრო და მეტი ახალი საცხოვრებელი კორპუსი შენდება. წლების წინ აშენებულ ბინებზე კი მოთხოვნა ნელ-ნელა მცირდება. „ბიზნესპრესნიუსის“ ინფორმაციით, სპეციალისტები ძველ ბინებზე მოთხოვნის შემცირებას ფასს უკავშირებენ და ამბობენ, რომ ხშირად ახალ აშენებული ბინის ფასსა და ძველი ბინის ღირებულებას შორის განსხვავება მინიმალურია.

უძრავი ქონების პორტალ ss.ge-დან გამოთხოვილი ინფორმაციით ირკვევა, რომ დიდუბე-ჩუღურეთის რაიონში ძველი აშენებული (მეორადი) ბინის ფასი დაახლოებით 400 დოლარიდან იწყება.

ისანი-სამგორში - 450 დოლარიდან, გლდანი-ნაძალადევის რაიონში კი ბინის კვადრატული ფასი 500 დოლარიდან იწყება. 550 დოლარიდან იწყება ბინის ფასი ძველ თბილისში და ყველაზე ძვირი ფასი ვაკე-საბურთალოს რაიონშია, სადაც ბინის ფასი 600 დოლარიდან იწყება.

ფასის ზრდა დამოკიდებულია ბინის ადგილმდებარეობაზე, ასევე როგორი რემონტი აქვს და რამდენად კეთილმოწყობილია. გასათვალისწინებელია, რომ აღნიშნულ ფასებთან შედარებით შესაძლოა, ზოგიერთ ადგილას ნაკლებიც ღირდეს.

ცენტრალურ უბნებში კი უფრო მეტად ახალ ბინებზეა მოთხოვნა.

ამასთან, ISET-ის კვლევითი ინსტიტუტისა და ForSet-ის ერთობლივი პროექტის უძრავი ქონების ლაბორატორიის (REM lab) ფარგლებში გამოქვეყნებულ პუბლიკაციის მიხედვით, 2018 წლის მეორე კვარტალში, თბილისში უძრავი ქონების გაყიდვების წლიური ზრდა 35.8%-ია.