სიახლეები

კურორტი გუდაური ზამთრის სეზონთან შესახვედრად ემზადება

კურორტი გუდაური ზამთრის სეზონთან შესახვედრად ემზადება

გუდაურში ტურისტული ინფრასტრუქტურის მოწესრიგება აქტიურად მიმდინარეობს. 2018-2019 წლის ზამთრის სათხილამურო სეზონისთვის 6 ახალი საბაგიროს მშენებლობა და 1 საბაგიროს რეკონსტრუქცია სრულდება.

მცხეთა-მთიანეთის მხარის ადმინისტრაციის ცნობით, რეაბილიტაცია ჩაუტარდა ახალ გუდაურთან დამაკავშირებელ 1.2 კმ-იან გზის მონაკვეთს, რომელიც, როგორც ადგილობრივებს, ისე დამსვენებლებს კომფორტულად გადაადგილების შესაძლებლობას მისცემს. მიმდინარეობს სამუშაოები პარკირების სივრცის გაფართოებაზე.

 



მცხეთა-მთიანეთის გუბერნატორის შალვა კერესელიძის განმარტებით, შესაბამის სახელმწიფო უწყებებთან ერთად ინტენსიური მუშაობა მიმდინარეობს, რათა გუდაური ზამთრის სეზონს სრულად მომზადებული შეხვდეს.

„განახლებული საგზაო ინფრასტრუქტურა, დამატებითი საბაგიროების მშენებლობა, პარკირების სივრცის მოწესრიგება და გაფართოება კურორტს დამსვენებლებისთვის კიდევ უფრო მიმზიდველს გახდის, ხელს შეუწყობს ტურიზმის განვითარებას და დამატებითი სამუშაო ადგილების შექმნას“ – აღნიშნა მცხეთა-მთიანეთის გუბერნატორმა შალვა კერესელიძემ.