სიახლეები

გუდაურში 20 დეკემბრამდე 6 ახალი საბაგირო დაიწყებს ფუნქციონირებას

გუდაურში 20 დეკემბრამდე 6 ახალი საბაგირო დაიწყებს ფუნქციონირებას

15 დეკემბერს გუდაურში ზამთრის სეზონი იხსნება, რომელსაც მთის კურორტი განსაკუთრებული სიახლეებით ხვდება. მაგალითად, 20 დეკემბრამდე 6 ახალი საბაგირო დაიწყებს ფუნქციონირებას . ასევე აღსანიშნავია ახალი სათხილამურო არეალიც, რომელიც 20%-ით ზრდის გუდაურში სასრიალო ტრასებს.


ახალი საბაგიროები დეკემბრის დასაწყისში სატესტო რეჟიმში გადავა, სრულ მზადყოფნაში კი ნაწილი 15 დეკემბრისთვის, ხოლო ნაწილი 20 დეკემბრისთვის იქნება. წელს ასევე გაიხსნება კობი-გუდაურის დაახლოებით 7.5 კმ-იანი საბაგირო, რომელსაც ინფრასტრუქტურის სამინისტრო აშენებს და ის კობიდან გუდაურში ტურისტების დაკავშირებაც შეუწყობს ხელს.


საბაგიროს მოწყობა დაახლოებით 18 მილიონი ლარი დაჯდა. მისი მშენებლობა 2018 წელს დაიწყო და წელსვე დასრულდება. 2018 წელს გუდაურში დამსვენებლებს ჯამში დაახლოებით 10 საბაგირო მოემსახურება.


ტურიზმის ეროვნული ადმინისტრაციის მიერ მოწოდებული ინფორმაციის მიხედვით, გუდაურში წელს ჯამში 48 განთავსების საშუალებაა (935 ოთახი), ხოლო საწოლი ადგილების რაოდენობა 2 361-ია.



რაც შეეხება მშენებარე განთავსების საშუალებებს, 2018-2020 წლებში 4 ახალი განთავსების საშუალება (275 ოთახი) და 595 საწოლი ადგილი იქნება.


მიუხედავად ამისა, მაღალმთიანი კურორტი ტურისტულად აქტიურ სეზონს წინა წლების მსგავსად წელსაც მრავალი ინფრასტრუქტურლი თუ ყოფითი პრობლემებით ხვდებოდა.

„კომერსანტი“ შეეცადა გაერკვია თუ როგორ შეხვდება გუდაური ახალ სეზონს და რამდენადაა მზად მისი ინფრასტრუქტურა ტურისტების სრულფასოვანი მიღებისთვის?



ყაზბეგის მუნიციპალიტეტის მერის მოადგილე დავით ქირიკაშვილი „კომერსანტის“ შეკითხვას ასე პასუხობს — „მიმდინარე წელს ახალ გუდაურში დაახლოებით 6კმ-იანი გზა დაიგო. 2019 წელს დაახლოებით 5 კმ-მდე შიდა გზების რეაბილიტაციას ვგეგმავთ და მასში დაახლოებით 5 მილიონი ლარის ინვესტიცია ჩაიდება. წელს ტურისტებს გუდაურში შიდა გზები მოწესრიგებული დახვდება.



სამომავლოდ საბავშვო ბაღის მშენებლობა იგეგმება, რომელშიც დაახლოებით ნახევარი მილიონი ლარის ინვესტიცია ჩაიდება. ამ ეტაპზე საპროექტო სამუშაოები მიმდინარეობს.



„გაერთიანებული წყალმომარაგების“ კომპანიამ ამ ეტაპისთვის უკვე მოახდინა სისტემების სრული რეაბილიტირება და შიცვალა,“ - განაცხადა ქირიკაშვილმა.



როგორც მერის მოადგილე აცხადებს, გუდაურში არ ყოფილა ისეთი პროექტი, რომლის განხორციელებაც წელს იგეგმებოდა და მისი განხორციელება მომავალი წლისთვის გადავადდა.


დავით ქირიკაშვილი მიიჩნევს, რომ ხელისუფლების მხრიდან ხშირად გამოთქმული მოსაზრება, რომ მთიან რეგიონებში ტურიზმის განვითარების ერთ-ერთი მნიშვნელოვანი წინაპირობა ინფრასტრუქტურის განვითარებაა, თუმცა მისივე განცხადებით, ასევე მნიშვნელოვანია მომსახურების სფეროს განვითარებაც.


„კომერსანტის“ კითხვაზე, როდის შეძლებს გუდაური ტურისტებისთვის ევროპული ტიპის მომსახურების შეთავაზებას, დავით ქირიკაშვილი აცხადებს, რომ ეს დროში გაწერილი საკითხებია, რასაც შესაძლოა 5, ან 10 წელი დასჭირდეს.


„კომერსანტი“ გუდაურში ტურისტებისთვის ერთ-ერთი უმნიშვნელოვანესი უსაფრთოხების დაცვის საკითხის გარკვევასაც შეეცადა.


როგორც მთის კურორტების განვითარების კომპანიის ყოფილმა ხელმძღვანელმა სანდრო ონოფრიშვილმა განაცხადა ყველა საბაგირო შემოწმებულია და არანაირი ტიპის ხარვეზი არ არსებობს. აღსანიშნავია ისიც, რომ წელს უცხოელი ექსპერტების მიერ საბაგიროს 170 თანამშრომელი გადამზადდა.

 

 

კომერსანტი